Vətəndaş Vilayət Eyvazova baş müstəntiqdən şikayət etdi – MÜRACİƏT

 


Bakı şəhəri, Xətai rayonu, Məhəmməd Hadi küçəsi 29-44, mənzil 269 ünvanında yaşayan Abbasov Azər Müzəffər oğlu Daxili İşlər naziri Vilayət Eyvazova müraciət edib. Anaxeber.info.az vətəndaşın müraciətini təqdim edir: 

“2024-cü ildən etibarən alt qonşum Bədəlzadə Elşən eyvanımın qarşısında təxminən 40 kvadratmetr sahədə otaq tikib. Həmin tikili bizim balkonun görüntüsünü tamamilə bağlayıb. Mən buna etiraz etsəm də, o, hüquqşünas olduğunu və gördüyü işin qanuni olduğunu bildirir. Bu məsələ ilə bağlı dəfələrlə "102" Xidməti, Xətai rayon İcra Hakimiyyəti, Fövqəladə Hallar Nazirliyi və Şəhərsalma və Arxitektura Komitəsinə müraciət etmişəm. Təəssüf ki, bu günə qədər müraciətlərimin heç bir nəticəsi olmayıb. Həmin şəxs artırmanın damını yüngül metal konstruksiyadan tikib. Yağış yağarkən damdan gələn güclü səs-küy səbəbindən evdə rahat oturmaq mümkün olmur. Bundan əlavə, yuxarı mərtəbələrdən atılan zibillər həmin artırmanın damında toplanır. Xüsusilə yay aylarında həmin zibillərdən yayılan üfunət qoxusuna görə evdə oturmaq mümkün olmur. Eyni zamanda, dam örtüyü yay aylarında həddindən artıq qızdığı üçün balkondan istifadə etmək mümkün olmur.

Biz bu şəxsə etiraz etdikcə, o, yenə də öz bildiyini edir və heç bir iradımıza məhəl qoymur. Bu səbəbdən Xətai Rayon Məhkəməsinə müraciət etmişik. Lakin hazırda həmin şəxs bizə qarşı da iddia qaldırıb. İddia edir ki, guya biz onların mənzilinə su axıtmışıq və buna görə ona 1700 manat məbləğində maddi ziyan dəyib. Bununla bağlı "102" Xidmətinə də zəng etmişəm. Post patrul xidmətinin əməkdaşları hadisə yerinə gəlib, həmin şəxslə söhbət edərək oranı tərk ediblər. Lakin bunun da heç bir nəticəsi olmayıb. Mənə məlum olub ki, həmin şəxs Bakı şəhəri Səbail Rayon Polis İdarəsinin İstintaq Şöbəsinin baş müstəntiqi, polis mayoru Elşən Bədəlzadədir. Bu səbəbdən Daxili İşlər Nazirliyinə də müraciət etmişəm. Müraciətim Bakı Şəhər Baş Polis İdarəsinə göndərilib. Lakin oradan da bildirilib ki, bu məsələ onların səlahiyyətinə aid deyil və nəticədə heç bir tədbir görülməyib.

Daha sonra həmin şəxs yoldaşımdan şikayət edib. Bu şikayət əsasında yoldaşımı 36-cı Polis Bölməsinə apararaq təxminən 7-8 saat nəzarətdə saxlayıblar. Ondan izahat alınmasına baxmayaraq, sərbəst buraxmayıblar və bildiriblər ki, "biz işimizi yaxşı bilirik".
Yoldaşım və qızım da bölmədə olublar. Yoldaşım vəkil tələb etdikdə ona "sizə vəkil yoxdur" deyilib. Daha sonra bildiriblər ki, ya həmin şəxsə dəydiyi iddia olunan 1700 manat ziyanı ödəməlidir, ya da onu məhkəməyə aparacaqlar. Həmçinin bölmədə yoldaşıma deyiblər ki, pulu ödəməsəniz, sizi məhkəməyə aparacağıq, orada sizi təhqir edəcəklər və sizdən daha çox pul alacaqlar.
Bundan başqa, həmin qonşu bizim balkonun qarşısında iki müşahidə kamerası quraşdırıb. Kameralardan biri birbaşa bizim balkona, digəri isə yuxarı mərtəbədə yaşayan qonşuların istiqamətinə yönəlib. Nəticədə nə rahat şəkildə balkona çıxa, nə də pəncərənin qarşısında dayana bilirik. Bununla bağlı da müvafiq qurumlara şikayət etmişəm. Təəssüf ki, bununla bağlı da bu günə qədər heç bir tədbir görülməyib.
Yuxarıda qeyd etdiyim bütün halların araşdırılmasını, qanunsuz tikintiyə, qanunsuz quraşdırılmış müşahidə kameralarına və mənim ailə üzvlərimə qarşı edilən qanunsuz hərəkətlərə hüquqi qiymət verilməsini, məsul şəxslər barəsində qanunvericiliyə uyğun tədbirlər görülməsini Sizdən xahiş edirəm.