İş adamı, yoxsa CİNAYƏT işi adamı - Hacı titullu Məhərrəm Novruzovun DOSYESİ

. .. Bir iş adamının adı bu qədər cinayət işində hallanarmı? Bilmirsən iş adamıdır, yoxsa cinayət işi adamı?! Hər halda, belə iş adamına baxanda deyirsən ki, Allah kəssin belə iş adamı olmağı - ölüm işləri, qanunsuz hərəkətlər, qalmaqal, yalnız cinayət hadisələri ilə gündəmə gəlmək...

Kimi deyirik - Məhərrəm Novruzovu. Çoxu onu hacı Məhərrəm kimi təqdim edir. Amma Azərbaycanda hacı titulu daşıyıb, adı bu qədər cinayət işində hallanan, bəli hallanan - yəni kimsə onu cinayət törətməkdə ittiham etmir - bir hacı var, o da hacı Məhərrəm Novruzovdur. 

Əlbəttə, cinayət işlərində adı keçən başqa hacı da var, amma onun titulu yox, doğma adıdır. İndisə Yer üzündə deyil və Hacı Məmmədov haqda çox şey aydındır. O Hacıdan fərqli olaraq, hacı Məhərrəm hələ ki həbs həyatı yaşamayıb. Amma bu gedişlə məsuliyyətə cəlb olunması istisna deyil. 

Anaxeber.info.az yazır ki, səbəb "Şəki Yaylası" istirahət mərkəzində iki gəncin ölümüdür. Biri evliliyin bir ilini qeyd etməyə getmişdi, biri isə toyuna hazırlaşırdı və bir ay qalmışdı. Məhərrəm Novruzovun "Şəki Yaylası" adlanan yiyəsiz obyekti isə birincinin evlilik həyatına 1 il sonra son qoydu, digərini isə toyuna 1 ay qalmış bu dünyadan ata olmadan köçürdü. Hazırda istintaq gedir və Cinayət Məcəlləsinə görə, məsuliyyət daşıyan tərəfi azı 7 il həbs gözləyir. 

Sadəcə, istintaqın yekununu gözləmək qalır. Sonra iki nəfərin ölümünə səbəb olan şəxslər də, obyektin sahibi də qanun qarşısında cavab verəcək. 

Bu dəhşətli hadisəyə gəldikdə isə suallar çoxdur: kanatın texniki vəziyyəti, təhlükəsizlik, sığorta və s. 

Ümumiyyətlə, kanatdan istifadəyə hansı qurumlar icazə verib? Bu qurumlar kanatın təhlükəsizliyini yoxlayıb zəmanət veriblərmi? Trosun qırılma səbəbi nədir, istismar müddəti və digər texniki amillər niyə yoxlanmayıb?

Bu azmış kimi, AzTV-nin süjetində Məhərrəm Novruzovun əl-üzünü yumaq cəhdi, guya kanata minməzdən əvvəl sığorta sənədinə imza atdırılmasını iddia etməsi və sair ilaxır. 

Hamısı hop-gop!

Hətta müğənni Niyam Salami də hacı statusu daşıyan Məhərrəm Novruzovu ittiham edib. 

Sitat: "3 ildir ki, ailəmin içərisindən başqa bu haqda danışa bilmirdim. Amma indi danışacağam. 3 ilin mənə verdiyi əzabları nə efirdə, nə də dostlar arasında danışa bilirdim. Onu Allaha tapşırmışdım. Doğrudan da, “səbr” sözü Allahın adıymış, səbr etdim. Bu gün də  gördüm ki, Hacı adından “zvanya” kimi istifadə edirsə, Allah onun cəzasını verir. Verdiyinə görə danışıram".


"Novxanı tərəfdə bir obyektdə çalışırdım. Orada bir il müqavilə ilə işlədim. İkinci ilə keçəndə qış ayında belə 350 adam mənə görə obyektə gəlirdi. İşləyə-işləyə mənə zülm edirdi, hər ay mənim üstümə adam göndərib faiz qaldırırdı. Mən orada sənin üçün fəhlə işləməli idim?

Gedirdi, açıq-saçıq geyinən hansısa yəhudi qadını gətirirdi, deyirdi ki, bu qadın müdirdir. Deyirdim, axı oranı işlədən bizik, bizdən başqa bu qadın kimdir?

Pul işinə də onun adamları baxırdı. Mühasib də düz danışdığına görə məndən sonra işdən çıxarılmışdı”, - müğənni belə deyib. 

Niyam Salami bildirib ki, obyektdən ayrılmaq istəyəndə ona borcların ödəniləcəyi deyilib və bundan sonra həmin borclarla bağlı problemlərlə üzləşdiyini iddia edib:

“Mən dedim ki, istəyirəm çıxım gedim. Həmin yəhudi qadını gətirdi, qoydu mənim yerimə. Mənə başladılar zülm etməyə. Mən oradan çıxmaq istədim. Dedi ki, bu dəqiqə çıxsın. Mən də dedim ki, axı borclar var, onlar ödənilməlidir. Mənə deyildi ki, o borclar ödəniləcək və mən getdim.

Amma gedən kimi də borc üçün gələn bütün şirkətləri mənim üstümə göndərirdilər. Çünki obyekt mənim adıma olduğu üçün bütün borclu olduğumuz şirkətlər mənim üstümə gəlirdi. Onlar hər gün səhər tezdəndən başlayaraq mənə zəng edirdilər”.

Niyam Salami daha bir iddia səsləndirərək ad günü münasibətilə ona ev hədiyyə edilməsi ilə bağlı sənədlər təqdim olunduğunu, lakin sonradan həmin sənədlərin saxta olduğunu öyrəndiyini deyib:

“Hətta işlədiyim dövrdə mənim ad günümdə mənə saxta sənəd gətirmişdi ki, guya “Qurtuluş”da mənə ev hədiyyə edir. Mən onda dedim ki, o hədiyyəni istəmirəm. Dedim ki, evin qiyməti 80 min manatdırsa, onun maya dəyəri olan 40 mini ödəyəcəyəm. Mən də qol çəkdim. Amma sonra bildim ki, bütün sənədlər saxta imiş. Bu cür saxta işlərlə məşğul idi”.

Bu bəyanatlar havadan səslənmir. Ona görə də, hacı titulu daşıyan Məhərrəm Novruzov ictimaiyyətdə neqativ reputasiyası olan iş adamı kimi tanınır. Üstəlik, onun adına bağlı cinayət işi ilk deyil. 

Anaxeber.info.az media üzərindən araşdırma apararaq faktları yada salır: 

Belə ki, 90-HN-009 dövlət nişanlı ““Mercedes Galandewagen” markalı avtomobili idarə edən Hüseynova Gülnar Əsəd qızı o zaman sükana nəzarəti itirib. Avtomobil Masazırdakı duz gölünün yanında “Nissan”a, daha sonra “Mercedes” və “VAZ 2106” markalı nəqliyyat vasitələrinə çırpılıb. Qəza zamanı üç nəfər xəsarət alıb. Gülnar Hüseynova isə “Qurtuluş 93” MTK-nın rəhbəri Məhərrəm Novruzovun həyat yoldaşıdır.

Bunu bir kənara qoyaq. 

Bundan əvvəl isə Novxanı qəsəbəsində dörd nəfərin ölümünə səbəb olan qəza baş verib. Hacı titullu Məhərrəmin kürəkəni Elşad Kəlbəliyevin idarə etdiyi “Range Rover” (dövlət nömrəsi 10 CO 002) yüksək sürətlə “Daewoo Damas”a çırpılıb. Avtomobildə olan Murad Ziyadov, Kamran Əhmədov, Elman Şıxəliyev və Yunis Mürsəlov yerindəcə ölüb. Daxili İşlər Nazirliyindən Elşad Kəlbəliyevin sərxoş vəziyyətdə olduğu bildirilib.

Yəni kürəkəni 4 nəfəri, özünün obyektində kanat isə 2 nəfəri öldürüb. 

Onu da yad salaq ki, Məhərrəm Novruzov uzun illərdir tikinti, daşınmaz əmlak, turizm, iaşə və idman sahələrində fəaliyyət göstərir. Onun adı xüsusilə “Bağçalı Evlər” MTK və bu şirkətin həyata keçirdiyi layihələrlə əlaqələndirilir.

“Bağçalı Evlər” MTK-nın 2006-cı ildən Azərbaycanda müxtəlif layihələrə sərmayə yatırdığı bildirilir. Şirkətin əsas layihələrindən biri Abşeron rayonunun Masazır qəsəbəsində yerləşən “Qurtuluş-93” yaşayış kompleksidir.

Novxanıda, Xəzər dənizinin sahilində yerləşən “My Beach” hotel-restoran kompleksinin də Məhərrəm Novruzov tərəfindən təsis edildiyi bildirilir.

Məhərrəm Novruzovun adı əvvəlki illərdə mediada müxtəlif mübahisələr fonunda da hallanıb.

2017-ci ildə Ukrayna vətəndaşı olan azərbaycanlı Nazim Qəzənfərov iş adamına qarşı maliyyə mübahisəsi, əmlakın mənimsənilməsi və hədə-qorxu ilə bağlı iddialar səsləndirib.

Kəsəsi, ölkədə hacı statusu olan yüzlərlə təmiz, halal adamlar olduğu kimi, adı cinayət işlərində keçənləri də var. 

Buna qədər olanlar artıq son hadisədə təəccüb doğurmur: tikinti içində qalmaqal, müğənniyə qarşı olanlar, yaxınlarının törətdiyi qəzalar və ölüm işləri, indi də öz obyektində 2 gəncin ölümü. Hər şey bir yana, amma son hadisədə Məhərrəm Novruzov öz obyektində nəzarəti gücləndirməliydi... 

Azər Talıbov